Биыл Құрбан айт мерекесі елімізде ұлттық салт-дәстүрге сай кең көлемде ұйымдастырылады, ,-деп хабарлайды «Dalamedia» ақпараттық порталы. Айт күндері республика бойынша түрлі мәдени-көпшілік шаралар өтіп, мешіт аулаларында киіз үйлер тігіліп, ұлттық спорт түрлерінен жарыстар ұйымдастырылады.

Бұл туралы ҚМДБ төрағасы, бас мүфти Наурызбай қажы Тағанұлы мәлімдеп, қазақстандықтарды мерекені ұлттық нақышта қарсы алуға шақырды. Оның айтуынша, жұртшылық айт күндері ұлттық киім киіп, ата дәстүрді ұлықтауға көңіл бөлгені жөн.

Сондай-ақ мереке қарсаңында ел ішінде татулық пен ауызбіршілікті нығайту мақсатында «Айт – татулық мерекесі» акциясы өтеді. Игі бастама аясында араздасқан жандарды татуластыру көзделген.

Діни басқарма құрбан шалудың негізгі талаптарын да еске салды. Құрбандық айт намазынан кейін шалынады. Шариғат талабына сай қой мен ешкі бір жастан асқан, сиыр екі жасқа толған, ал түйе бес жаста болуы қажет. Сонымен қатар құрбандыққа шалынатын малдың дені сау, ешбір кемшілігі болмауы шарт.

Еске салайық, биыл Құрбан айт 27 мамырда басталады. Бұл күн ресми демалыс болып белгіленген. Ал 26 мамыр – Арапа күні.

Бас мүфти кәсіпкерлерді де халықтың жағдайын ескеруге шақырды. Оның сөзінше, Құрбан айт кезінде мал бағасын негізсіз өсірмей, азық-түлікке мүмкіндігінше жеңілдік жасау – қайырымдылық пен жанашырлықтың көрінісі.

«Құрбан айт – тек діни мереке ғана емес, ел ішіндегі бірлік пен татулықты бекемдеп, қайырымдылықты дәріптейтін рухани мейрам», – деді Наурызбай қажы Тағанұлы.