Қазақстан мұсылмандары діни басқармасы Құрбан айт кезінде құрбан шалуды қашықтан рәсімдеуге мүмкіндік беретін арнайы онлайн платформаны іске қосты, — деп хабарлайды «Dalamedia» ақпараттық порталы.

ҚМДБ мәліметінше, бұл бастама әсіресе ірі қалаларда тұратын тұрғындардың рәсімді жеңіл әрі қолайлы түрде орындауына жағдай жасау мақсатында қолға алынған. Биыл да құрбан шалу дәстүрі бұрынғыдай офлайн түрде де, сондай-ақ онлайн форматта да жүзеге асырылады. Осыған байланысты арнайы сайт жұмысын бастады.

Жаңа жүйе арқылы азаматтар құрбандық малын таңдап, Kaspi QR арқылы төлем жасай алады. Діни басқарма өкілдері қой мен ешкіні бір адам жеке өзі шала алатынын, ал ірі қара мен түйені бір немесе жеті адамның бірігіп шалуы мүмкін екенін еске салды.

Тапсырыс сәтті рәсімделген жағдайда пайдаланушыға SMS хабарлама жіберіледі. Сондай-ақ құрбандық орындалғаннан кейін оның фото және бейне есебі тапсырыс берушінің нөміріне жолданады.

Айта кетейік, 2026 жылы Құрбан айт мерекесі 27 мамыр күні атап өтіледі.