АҚШ Иран аумағында жаңа соққылар жасағаны туралы ақпарат тарады. Бұған жауап ретінде Тегеран мұнай бағасы бір баррель үшін 200 долларға дейін көтерілуі мүмкін екенін ескертті, — деп хабарлайды «Dalamedia» ақпараттық порталы.

АҚШ әскері Иранның оңтүстігіндегі зымыран ұшыру нүктелері мен Ормуз бұғазында мина орнатпақ болған катерлерге соққы жасаған. Америкалық тарап бұл операцияның мақсаты өз әскери қызметкерлерін Иран тарапынан төнген қауіптен қорғау екенін мәлімдеген. Нысана ретінде зымыран қондырғылары мен бұғазда мина қоюға әрекеттенген катерлер алынған.

БАҚ-тағы мәліметке сәйкес, Ормуз бұғазында екі ирандық катердің мина орналастырғаны анықталған. Осыдан кейін АҚШ әскері Ислам революциясы сақшылары корпусының екі кемесін жойып, Бендер-Аббас қаласындағы америкалық ұшақтарға бағытталған әуе қорғанысы жүйесіне де соққы бергені айтылады.

Fox News тілшісі Дженнифер Гриффиннің айтуынша, бұл әрекеттер атысты тоқтату режимінің тоқтағанын білдірмейді және қорғаныс сипатында жасалған операция ретінде қарастырылады.

Ал Иран Қарулы күштерінің «Хатам әл-Анбия» орталық штабының ресми өкілі Эбрагим Зольфагари АҚШ соққыларынан кейін Тегеран жауап қайтаратынын мәлімдеді. Оның сөзінше, жағдайдың ушығуы мұнай бағасын баррельіне 200 долларға дейін көтеруі мүмкін.

«АҚШ мәселелерді күш қолдану арқылы шешуге тырысып отырғанын бірнеше рет көрсетті. Мұнайдың 200 долларға жетуіне дайын болыңыздар», — деді ол.

Айта кетейік, АҚШ пен Иран арасындағы сәуірде жарияланған атысты тоқтату режимі әлі де күшінде екені хабарланған. Бұған дейін АҚШ президенті Дональд Трамп бұл келісімді қосымша шешімге дейін ұзартқан болатын.

Сондай-ақ БАҚ-та БАӘ-нің Иранға қарсы әрекеттерге жасырын түрде қатысқаны жөнінде деректер жарияланған еді. Сол мәліметтерде Парсы шығанағындағы Лаван аралындағы мұнай нысанына жасалған соққыдан кейін ірі өрт болып, зауыт жұмысының бір бөлігі ұзақ уақытқа тоқтап қалғаны айтылады.