Ислам революциясы сақшылары корпусы Израиль премьер-министрі Биньямин Нетаньяху кеңсесіне зымыранмен соққы жасалғанын мәлімдеді, – деп хабарлайды «Dalamedia» ақпараттық порталы.

Иран өкілдерінің мәліметінше, шабуыл «Kheibar» зымырандары арқылы жасалып, бұл Израильге қарсы оныншы қарымта соққы болған. Қазіргі уақытта Нетаньяхудың жағдайы туралы нақты ақпарат жоқ. Израильдің ресми өкілдері де бұл мәлімдемеге қатысты әзірге пікір білдірмеді.

Сонымен қатар Иран Сауд Арабиясы аумағындағы стратегиялық маңызы бар нысанаға да соққы жасалғанын мәлімдеді. Салдарынан «Saudi Aramco» компаниясына тиесілі Рас-Таннура аймағындағы ірі өндіріс орны зақымданған. Мұнда өндірілген шикізаттың едәуір бөлігі Азия, Еуропа және АҚШ нарықтарына жөнелтіледі.

Сарапшылардың бағалауынша, аталған инфрақұрылымға келтірілген ықтимал залал тек аймақтық шиеленіспен шектелмей, жаһандық энергия нарығына да әсер етуі мүмкін. Бұл жағдай Таяу Шығыстағы геосаяси ахуалдың одан әрі күрделене түсу қаупін арттырып отыр.