Иранның жоғарғы жетекшісі Әли Хаменеи қайтыс болғаннан кейін елде 40 күндік аза тұту жарияланды. Экономикалық сарапшы Алмас Чукин бұл оқиға Иранмен ғана шектелмей, бүкіл өңір үшін маңызды өзгерістерге жол ашуы мүмкін екенін айтты, – деп хабарлайды «Dalamedia» ақпараттық порталы.

Сарапшының айтуынша, Ирандағы биліктің ауысуы Орталық Азия елдерінің экономикасына, әсіресе логистика мен сауда бағыттарының дамуына тікелей әсер етуі ықтимал. Өйткені Иран аумағы арқылы Еуропаға шығатын ең қысқа әрі тиімді құрлық жолын қалыптастыруға мүмкіндік бар.

Алмас Чукин Түрікменстан мен Иран теміржолдарының түйісу нүктесінен Парсы шығанағына дейінгі қашықтық 1200–1500 шақырым шамасында екенін атап өтті. Бұл бағыт арқылы Парсы шығанағындағы ірі порттарға шығып, мұнай мен ауыл шаруашылығы өнімдерін теңіз жолымен Еуропаға жеткізуге болады. Мұндай логистика жүк тасымалын айтарлықтай жеңілдетеді.

Экономистің пікірінше, егер Иранға салынған санкциялар алынатын болса, бұл Қазақстан үшін де жаңа мүмкіндіктер ашады. Атап айтқанда, мұнай мен өзге де тауарларды Ресей аумағын айналып өтетін қысқа бағытпен тасымалдауға жол ашылып, өңір экономикасына тың серпін берілуі мүмкін.