Азаматтардың телефонына полиция өкілдерінің атынан жолданған жалған хабарламалар көбейген. Мұны Қарағанды облысының Полиция департаменті мәлімдеді, – деп хабарлайды «Dalamedia» ақпараттық порталы.

Қарағанды облысы ПД азаматтарды күмәнді SMS ішіндегі сілтемелерге өтпеуге, бейтаныс сайттарға карта деректерін енгізбеуге шақырды. Мәліметтерге сүйенсек, соңғы уақытта азаматтарға «төленбеген айыппұл» туралы SMS-хабарламалардың келуі жиілеп кеткен. Мамандардың айтуынша, бұл – ресми органдардың атын жамылған алаяқтардың әрекеттері. Олар өздерін жол полициясымыз деп таныстырып, айласын асыруға тырысады. Сондықтан жауаптылар азаматтарды барынша мұқият болуға шақырады.

Қаскөйлер түрлі сілтемелерді пайдаланып, жеке деректерге, банк шотына қол жеткізуді көздейді. Сондықтан құзыретті орган өкілдері барынша сақ болу керектігін ескертеді.

Мамандардың сөзінше, айыппұлдың бар-жоғын мына сервистерден анықтауға болады:

qamqor.gov.kz

eGov.kz

Банктердің ресми мобильді қосымшалары

Ресми түсініктемеде мұндай хабарламалар еленбеуі тиіс екені айтылған. Қажет болған жағдайда құқық қорғау органдарына жүгіну ұсынылады.

Айта кетейік, бұған дейін елде кейбір әкімшілік айыппұлдарды рақымшылық аясында есептен шығару мәселесі қарастырылғаны хабарланған еді.