Азаматтарға хат жазып ақша тапқан қылмыстық топ құрықталды, — деп хабарлайды «Dalamedia» ақпараттық порталы.

Қылмысты ашуға Қаржылық мониторинг агенттігі, Бас прокуратура және ұялы байланыс операторлары атсалысқан. Айта кетерлігі, ТМД елдерінде бұл тәсіл алғаш рет әшкере болып отыр.

Тергеу мәліметтеріне сүйенсек, күдіктілер SMS-бластер құрылғысын қолданған. Аталмыш құрылғы базалық байланыс станциясы секілді жұмыс істеп, 300 метр радиус көлемінде сигнал таратады. Салдарынан жақын маңдағы телефондар автоматты түрде осы жалған желіге қосылып, алаяқтар үшін қолжетімді болады. Бұл тәсіл арқылы олар сағатына 100 мыңға дейін SMS таратқан.

Жолданған хабарламалар байланыс операторлары мен банктердің атынан жіберіліп, азаматтарға «бонустарды айырбастау» туралы жалған сілтемелер ұсынылған. Сан соққан тұрғындар сілтеме арқылы өтіп, жеке мәліметтерін, соның ішінде:

· Банк картасының деректерін;

· CVV-кодты;

· SMS арқылы келген растау кодын енгізген.

Осылайша, күдіктілер адамдардың құпия ақпараты мен қаржысын иемденіп отырған. Қазіргі таңда төрт күдікті қамауға алынып, тергеу амалдары жалғасуда.