Астанада бір топ азамат «Qyran» тұрғын үй кешенінде сатылып кеткен пәтерлерді екінші рет сатып, тұрғындарды алдаған,-деп хабарлайды «Dalamedia» ақпараттық порталы.

Бас прокуратура мәліметінше, күдіктілер өздерін құрылыс компаниясының қызметкерлері ретінде таныстырып, тұрғындарға пәтерлерді сатамыз деп сендірген. Олар жалған құжаттар рәсімдеп, тұрғындардың ақшасын өз шоттарына аударып отырған.

“Күдіктілер «International Invest Company IIC» ЖШС атынан әрекет етіп, азаматтарға жылжымайтын мүлікті нарық бағасынан төмен ұсынып, қызықтырған. Пәтерлердің макеттерін, техникалық паспорттарын көрсетіп, тұрғын емес үй-жайлар мен автотұрақ орындарын алдын ала келісімшарттар немесе брондау арқылы сатқан. Алайда бұл мәмілелер мемлекеттік тіркеуден өтпеген”, – делінген хабарламада.

Осы схемамен олар 8 миллиард теңгеден аса қаражатты иемденген.

Сот шешімімен күдіктілердің жалпы мүліктеріне 7,4 миллиард теңге құны бойынша тыйым салынды. Үш адам қамауға алынды, ал төртіншісі кепілмен босатылды. Қылмыстық іс қазір сотқа жолданған.