Қазақстан Республикасы Бас прокуратурасы WhatsApp мессенджерінде аккаунттарды «үнсіз басып алу» қаупі туралы ескертті. Ведомство мәліметінше, кибералаяқтар «GhostPairing» деп аталатын жаңа әдісті қолдануда.

Аталмыш тәсіл құпиясөзді бұзуды немесе SIM-картаны ауыстыруды қажет етпейді. Алаяқтар WhatsApp-тағы «қосымша құрылғыларды байланыстыру» функциясын пайдаланып, пайдаланушының аккаунтына заңды түрде қол жеткізеді.

Қылмыстық схема барысында азаматтарға Facebook немесе WhatsApp атынан жалған хабарламалар жолданып, ресми интерфейске ұқсас фейк-парақшаларға бағытталады. Онда телефон нөмірі мен растау кодын енгізу сұралады. Нәтижесінде бөгде тұлғалар аккаунтқа толық қол жеткізе алады.

Мамандар аккаунттың қауіпсіздігін тексеру үшін «Байланыстырылған құрылғылар» бөлімін жүйелі түрде қарап отыруды және екі факторлы аутентификацияны қосуды ұсынады.