Экология министрлігінің мәліметінше, шара жергілікті уақыт бойынша сағат 20:30-да басталады. Осы уақытта тұрғын үйлерде, кеңселерде және көшелерде жарық бір сағатқа сөндіріледі.

«Жер сағаты» – Дүниежүзілік жабайы табиғат қоры ұйымдастыратын халықаралық бастама. Акцияның мақсаты – табиғатты қорғауға назар аудару және энергияны үнемдеуге үндеу. Осы күні әлемдегі танымал ғимараттар мен тарихи нысандар да жарықтан ажыратылады.

Жыл сайын бұл бастамаға 180 елден мыңдаған қала қатысады. Биыл акция әлемде 19-рет, ал Қазақстанда 17-рет өтеді.

Елімізде де бірқатар нысандардың жарығы сөндіріледі. Олардың қатарында Бәйтерек монументі, Астана Опера театры, Әзірет Сұлтан мешіті, Тәуелсіздік сарайы, Астана Арена стадионы, Алау мұз айдыны және Қазақстан қонақ үйі бар.

Мамандар акцияны қолдау үшін тұрғындарды осы уақытта жарық пен тұрмыстық электр құралдарын өшіріп, экологиялық бастамаға үлес қосуға шақырады.