ҚР Ішкі істер министрлігі алаяқтықтың тағы бір тың тәсілі пайда болғанын мәлімдеді, — деп хабарлайды «Dalamedia» ақпараттық порталы.

Министрлік таратқан деректерге сүйенсек, қаскүнемдер азаматтармен байланысқа шыққанда өздерін түрлі компаниялардың, мемлекеттік органдардың немесе жоғары оқу орындарының басшылары ретінде таныстырады. Олар телефон немесе мессенджерлер арқылы хабарласқанда бөгде нөмірлер мен жалған деректерді пайдаланады.

Алаяқтар «жеке деректеріңізді таратамыз» немесе «қаржыңыз ұрлануы мүмкін» деп айла жасайды. Соның салдарынан психологиялық қысымға ұшыраған азаматтар арандап, сан соғып қалуы мүмкін. Өкілетті орган өкілдері айлакерлердің заманауи технологияларды да кеңінен қолданатынын алға тартады.

ІІМ ескертуінше, банк немесе мемлекеттік орган қызметкерлері ешқашан телефон арқылы ақша аударуды талап етпейді.

Осыған байланысты азаматтарға бейтаныс адамдардың айтқанына ермеу, кез келген ақпаратты тек ресми дереккөздер арқылы тексеру және күмәнді жағдай туындаса, бірден құқық қорғау органдарына жүгіну ұсынылады.