Әлеуметтік желілерде 69 жастағы қазақстандық әженің ұзату рәсімі түсірілген бейнежазба кең тарап, жұрт арасында қызу талқыға түсті, — деп хабарлайды «Dalamedia» ақпараттық порталы.

Видеода кейуана қалыңдық кейпінде киіндіріліп, туған-туыстары оны салт-дәстүрмен, ән-жырмен ұзатып салып жатқаны көрінеді. Сондай-ақ кадрларда “жас жұбайлардың” лимузинмен аттанған сәті де бар. Бұл бейнежазба әлеуметтік желіде миллиондаған қаралым жинап, түрлі пікірге себеп болды.

Видео TikTok желісінде жарияланған. Автордың айтуынша, бұл оқиға – бір отбасының ұзақ жылдар бойы сақтап келген уәдесінің орындалуы. 50 жыл бірге өмір сүрген ерлі-зайыпты кезінде айтылған арманды жүзеге асырып, дәстүр бойынша ұзату тойын қайта өткізген.

Бұл сәтті олардың немересі Адина бөліскен. Оның айтуынша, бұл тек мерекелік рәсім емес, әжесінің көптен бергі арманы болған.

“Аңыз бол: әжең сенің емес, сен әжеңнің ұзатуын көр”, – деп жазған ол.

Кейін белгілі болғандай, ұзату тойы 9 мамыр күні Түркістан облысы Сарыағаш маңындағы Мәдениет ауылында өткен. Басты кейіпкерлер – Боранкүл мен Ербосын. Қазіргі таңда әже 69 жаста, атасы 74 жаста.

Немересінің айтуынша, ерлі-зайыпты жас кезінде дәстүрлі ұзату рәсімін толық жасай алмаған. Себебі Ербосын ата болашақ жарын алып қашып кеткендіктен, сол кезеңде салт-жоралғы орындалмаған. Кейін ол жарына уәдесін беріп, бір күні осы арманын орындайтынын айтқан.

“50 жыл бұрын атам әжеме: ‘уақыты келгенде сені қайтадан ұзатып аламын’ деп уәде берген”, – дейді немересі.

Жарты ғасыр өткен соң сол уәде орындалған. Ұзату рәсімі әженің төркін жағында өткізіліп, дәстүрлі жөн-жоралғылар жасалған. Тойға барлық отбасы жиналып, ақ тілектер айтылып, әнмен шығарып салу рәсімі өткен.

Бүгінде Боранкүл әже мен Ербосын ата балалары мен немерелерінің ортасында тату-тәтті ғұмыр кешіп отыр.