Маңғыстау облысында қоқысқа көмілген алқаптың видеосы әлеуметтік желіде кең тарап, қызу талқыға түсті. Кадрларды экобелсенді Азамат Сарсенбаев жариялаған. Ал облыс әкімдігі бұл жағдайға қатысты тексеріс жүргізіліп жатқанын мәлімдеді, ,-деп хабарлайды «Dalamedia» ақпараттық порталы.

Белсендінің Instagram парақшасында жарияланған видеода қоқыс үйілген иен дала мен жайылып жүрген түйе көрінеді. Жазба астына «Ұлы Маңғыстау даласы…» деген қысқа ғана сипаттама қалдырылған.

Көпшілік бұл көрініске бейжай қарамады. Бірі видеоны шындыққа жанаспайды десе, енді бірі мәселені шешудің жолын ұсынып, сенбілік ұйымдастыруға шақырды. Пікір қалдырғандар арасында «демалыс күндерінің бірін арнап, бәріміз бірігіп тазалыққа шығайық» деген ұсыныстар да болды. Тағы бірқатар қолданушылар қоқыстың көбеюіне жергілікті тұрғындардың өзі себеп болуы мүмкін екенін айтып, экологияға жауапкершілікпен қарауға үндеді.

Осы жағдайға қатысты Маңғыстау облысының табиғи ресурстар және табиғат пайдалануды реттеу басқармасы түсініктеме берді. Видеодағы аумақ – Мұнайлы ауданына қарасты Баянды ауылындағы қатты тұрмыстық қалдықтар полигоны екені белгілі болды.

Басқарма мәліметінше, бұл жерде қалдықтарды жинау мен орналастыру белгіленген талаптарға сай жүргізіледі. Алайда кейде желдің әсерінен жеңіл қалдықтар полигон аумағынан сыртқа ұшып кетуі мүмкін.

Сондай-ақ, аталған аумақта жуырда ғана тазалық жұмыстары жүргізілгені айтылды. 18 сәуірде сенбілік өтіп, полигон маңы ретке келтірілген. Бірақ 20 сәуір күні болған өрт пен қатты желдің салдарынан қағаз, плёнка секілді жеңіл қалдықтар қайтадан жан-жаққа таралған.

Мамандар бұл жағдайдың уақытша екенін алға тартып отыр. Қазір полигон аумағын және оның маңын толық тазарту жұмыстары жүріп жатыр. Арнайы техника тартылып, тиісті қызметтер күшейтілген режимде жұмыс істеуде.

Жергілікті билік тазалау жұмыстары жақын күндері аяқталып, нәтижесі бойынша есеп берілетінін мәлімдеді. Қазір жағдай тұрақты бақылауда.