Қазақстанда кент мәртебесін беру тәртібі өзгереді. Енді халқы небәрі 500 адамнан асатын елді мекендерге де кент мәртебесін беру қарастырылып отыр, — деп хабарлайды «Dalamedia» ақпараттық порталы.

Парламент еліміздің әкімшілік-аумақтық құрылысына қатысты конституциялық заңды қабылдады. Жаңа құжатта елді мекендердің мәртебесін анықтау тәртібі қайта қаралған.

Заңға сәйкес, қалалық елді мекендер қатарына барлық деңгейдегі қалалар енгізілсе, ауылдық елді мекендер санатына әкімшілік бағынысына қарамастан ауылдар мен кенттер жатқызылады.

Сондай-ақ кент мәртебесін беру талаптары да жеңілдетілді. Бұған дейін мұндай мәртебе алу үшін елді мекенде кемінде 3 мың тұрғын болуы қажет еді. Енді бұл көрсеткіш 500 адамға дейін төмендетілмек.

Құжатта Президенттің, Үкіметтің және мемлекеттік органдардың әкімшілік-аумақтық құрылысқа қатысты өкілеттіктері де нақтыланған. Мемлекет басшысы облыстар мен аудандарды құруға немесе таратуға, сондай-ақ елді мекендерге республикалық, облыстық және аудандық маңызы бар қала мәртебесін беруге құқылы болады.

Ал Үкімет Президент қарауына ұсыныстар енгізіп, астана мен облыстардың, республикалық маңызы бар қалалардың шекарасын белгілеу және өзгерту мәселелерімен айналысады.

Сонымен қатар жергілікті атқарушы және өкілді органдарға елді мекендердің әкімшілік бағынысын анықтау, шекарасын бекіту және өзгерту секілді құзыреттер берілген.

Жаңа заңға сәйкес, елді мекендердің шекарасы енді бас жоспарлар мен даму схемалары негізінде айқындалады. Құжат Мемлекет басшысының қол қоюына жолданды.

Айта кетейік, бұған дейін Көлік министрлігі халқы 500 адамнан аз ауылдарға баратын жолдарды асфальттауға уақытша шектеу енгізуді ұсынған болатын. Жоба бойынша мұндай елді мекендерге кіреберіс жолдарға асфальт-бетон және цемент-бетон жабындарын төсеу 2027 жылға дейін шектелуі мүмкін.