Қазақстанда шетелдіктерге тұрақты тұруға рұқсат беру және қандас мәртебесін алу талаптарына өзгеріс енгізілді, ,-деп хабарлайды «Dalamedia» ақпараттық порталы.

Жаңа талапқа сәйкес, енді қазақ тілін білу деңгейін растайтын тестілеу сертификатын алу үшін әр бөлім бойынша шекті көрсеткіш 70 пайызға дейін көтерілді. Бұған дейін бұл меже 30 пайыз болған.

Егер шетелдік азамат тесттің бір немесе екі бөлімі бойынша 70 пайыздан төмен нәтиже көрсетсе, 30 күн ішінде емтиханды екі рет қайта тапсыруға мүмкіндік беріледі.

Сонымен қатар иммиграциялық әлеуетті бағалау бойынша ең төменгі өту балы 600-ге дейін ұлғайтылды. Бұған дейін бұл көрсеткіш 400 балл еді. Бағалау барысында үміткердің білім деңгейі, жұмыс тәжірибесі және қазақ, орыс, ағылшын тілдерін меңгеруі ескеріледі.

Төлем қабілеттілігіне қойылатын талап та күшейтілді. Енді шетелдік азамат кемінде 1320 АЕК, яғни шамамен 5,7 миллион теңге көлеміндегі қаражаты барын жыл сайын растауы тиіс. Бұрын мұндай растау өтініш қаралған кезде бір рет қана талап етілетін.

Сондай-ақ тұрақты тұруға рұқсатты қайтарып алу негіздері де кеңейтілді. Жаңа тәртіпке сай, үш реттен көп жол ережесін бұзған немесе екіден астам әкімшілік құқықбұзушылық жасаған азаматтардың рұқсаты кері қайтарылуы мүмкін.

Аталған өзгерістер 10 сәуірде Еңбек және халықты әлеуметтік қорғау министрлігі, Ішкі істер министрлігі және Цифрлық даму министрлігінің бірлескен бұйрығымен бекітілді.