Таиландта демалыс кезінде шала туған қазақстандық сәбиді елге медициналық авиация арқылы жеткізді, — деп хабарлайды «Dalamedia» ақпараттық порталы.

Денсаулық сақтау министрлігінің мәліметінше, нәрестенің жағдайы ауыр болған. Ол өкпені жасанды желдету аппаратына қосылып, тұрақты оттегі қолдауын қажет еткендіктен арнайы кювезде тасымалданды.

Сәбиді елге жеткізуге Ұлттық шұғыл медицинаны үйлестіру орталығының медициналық авиация мобильдік бригадасы жұмылдырылды. Құрамында дәрігер Жасұлан Жұмағұлов, фельдшер Болат Шәріпов және неонатология департаментінің басшысы Асхат Қуанышбаев болған.

Алматыға жеткізілгеннен кейін нәресте әрі қарай ем алу үшін Педиатрия және балалар хирургиясы ғылыми орталығына жатқызылды. Ведомство дәрігерлердің кәсіби және үйлесімді жұмысына алғыс білдіріп, сәбидің тезірек сауығып кетуін тіледі.

Айта кетейік, бұған дейін қазақстандық әйел Таиландқа демалысқа барып, жүктіліктің 28-аптасында мерзімінен бұрын босанып қалғаны хабарланған еді. Жаңа туған сәби сол кезде Пхукеттегі ауруханада жансақтау бөлімінде болған.