Астаналық медицина ғылымдарының докторы, жоғары санатты инфекционист Динагүл Баешева екпе мен аутизм арасында байланыс жоқ екенін айтты, — деп хабарлайды «Dalamedia» ақпараттық порталы.

Маманның сөзінше, кей ата-аналар баланың мінез-құлқындағы өзгерістерді екпемен байланыстырып жатады. Себебі аутизм белгілері кейде вакцина салдырған уақытпен тұспа-тұс келуі мүмкін.Алайда дәрігер бұл пікірдің ғылыми негізі жоқ екенін атап өтті.

“Вакцина мен аутизм – ең көп зерттелген тақырыптардың бірі. Соңғы 25 жылда миллиондаған баланы қамтыған зерттеулер жүргізілді. Барлық нәтиже бірдей: вакцина аутизм тудырмайды”, – деді Динагүл Баешева.Оның айтуынша, қате түсінік көбіне екі құбылыстың бір мезгілде байқалуынан туындайды.

Аутизмнің алғашқы белгілері – көзге тіке қараудың азаюы, сөйлеудің кешігуі, қарым-қатынас ерекшеліктері – әдетте 1,5–2 жас аралығында байқалады. Дәл осы кезеңде балаларға ревакцинация жасалады.Сондықтан ата-аналарда баланың дамуындағы өзгерістерді екпемен байланыстыру ойы туындауы мүмкін.

“Екі оқиғаның бір уақытта болуы олардың себеп-салдарлық байланысын білдірмейді”, – деп түсіндірді дәрігер.Баешева мұны қарапайым мысалмен жеткізді: біреу су ішкеннен кейін жаңбыр жауса, бұл жаңбырдың себебі су ішу дегенді білдірмейді.Маманның айтуынша, аутизм – баланың ми дамуына қатысты ерекшелік, ол көбіне туғанға дейінгі кезеңде қалыптасады. Мұнда генетика мен жүйке жүйесінің дамуы негізгі рөл атқарады. Ал вакциналар иммунитетті нығайтады және ми дамуына немесе генетикаға әсер етпейді.

Дәрігер екпеден бас тарту ауыр салдарға әкелуі мүмкін екенін де ескертті. Оның тәжірибесінде вакцинадан өтпеген балалар арасында ауыр инфекциялық аурулар жиі кездескен.“Көп ата-ана өкінішпен көмек сұрайды. Бірақ кейде кеш болып жатады. Ең дұрыс шешім – уақытылы вакцина салдыру”, – деді ол.Баешева екпелер балаларды көкжөтел, қызылша, дифтерия, паротит сияқты қауіпті аурулардан қорғайтынын атап өтті.“Балаларыңызды қорғаңыздар, екпеден қашпаңыздар. Оларға дені сау, қауіпсіз өмір сыйлау – ең басты міндет”, – деді дәрігер.