Қазақстанда медицина саласына дәрігерлердің жұмысын жеңілдетуге арналған жаңа жасанды интеллект жүйесін енгізу жоспарланып отыр. Ол науқастың шағымын саралап, алдын ала диагноз бен ем нұсқаларын ұсынуға көмектеседі,-деп хабарлайды «Dalamedia» ақпараттық порталы.

Жобаны әзірлеп жатқан Сұлтан Жұмабаевтың айтуынша, бұл жүйе дәрігер мен пациент арасындағы әңгімені жазып алып, оны бірден медициналық дерекке айналдырады. Яғни, айтылған сөздер құрылымдалып, автоматты түрде қабылдау картасына және науқастың медициналық құжатына енгізіледі.

Жиналған ақпараттың негізінде жүйе алдын ала диагноз қойып, емдеу жолдарын ұсынады. Дегенмен соңғы шешімді дәрігердің өзі қабылдайды.

Әзірлеушінің сөзінше, мұндай технология дәрігерлердің қағазбастылығын айтарлықтай азайтады. Соның арқасында мамандар пациентке көбірек көңіл бөліп, қабылдау сапасын арттыра алады. Құжат толтыруға кететін уақыт шамамен екі есеге қысқарады.

Қазір жоба еліміздің төрт өңіріндегі 38 клиникада сынақтан өткен. Оны 50-ден астам дәрігер қолданып жүр.