Астанада «Astana Smart City» жобасы аясында жол ережесін бұзушыларды тіркейтін жасанды интеллект негізіндегі бейнебақылау жүйесінің мүмкіндігі кеңейтіліп жатыр ,-деп хабарлайды «Dalamedia» ақпараттық порталы.

Қала әкімдігінің мәліметінше, жаңа жүйе көлік жүргізу кезінде телефон қолдану, қауіпсіздік белдігін тақпау сияқты бұзушылықтарды автоматты түрде анықтай алады. Қазіргі таңда бұл функциялар тестілік режимде іске қосылған.

Жүйе компьютерлік көру мен машиналық оқыту технологияларына негізделген. Бұл жолдағы жағдайды жедел әрі дәл талдауға мүмкіндік береді.

Бұрынғы бақылау жүйелерінен ерекшелігі – AI-камералар жеке бұзушылықтарды ғана емес, қалалық және мемлекеттік деректер базасымен біріктірілген ортақ цифрлық платформаның бір бөлігі ретінде жұмыс істейді.

Жоба тиісті тексеру және сертификаттау рәсімдерінен өтуде. Оны кезең-кезеңімен толық енгізу жоспарланған.

Мамандардың айтуынша, жаңа жүйе жол апаттарын азайтып, жүргізушілер тәртібін күшейтуге және қаладағы қауіпсіздікті арттыруға бағытталған.