Ішкі істер министрлігінің мәліметінше, мамыр айының басында жүргізілген жедел іс-шаралар барысында полицейлер қала аумағынан есірткі зертханасын анықтап, оның жұмысын тоқтатқан.

Тексеру кезінде қала шетіндегі жеке үйде күдіктілердің синтетикалық есірткіні ірі көлемде дайындап келгені белгілі болды. Оқиға орнын тінту барысында жарты тоннаға жуық сұйық мефедрон және 1,5 тонна прекурсор тәркіленген.

Сонымен қатар реактор, колбалар, магниттік араластырғыштар, канистрлер мен басқа да арнайы құрал-жабдықтар табылған.

ІІМ Есірткі қылмысына қарсы іс-қимыл комитеті төрағасының орынбасары Елдар Әбдікеновтің айтуынша, күдіктілерге қатысты Қылмыстық кодекстің 297-1-бабы бойынша сотқа дейінгі тергеу басталды.

Аталған бап бойынша кінәлілерге өмір бойына дейін бас бостандығынан айыру жазасы қарастырылған. Қазіргі уақытта күдіктілер уақытша ұстау изоляторына қамалды.

Министрлік өкілдері есірткі өндірісіне қатысты кез келген заңсыз әрекет қатаң түрде тоқтатылатынын атап өтті.