Ішкі істер министрлігі заңсыз дәрі саудасына қарсы жұмысты жалғастырып жатыр, — деп хабарлайды «Dalamedia» ақпараттық порталы.

Polisia.kz сайтында жарияланған мәліметтерге сәйкес, 30 наурыз бен 3 сәуір аралығында елімізде «Дәрмек» жедел-профилактикалық іс-шарасы өткізілген. Жүргізілген тексерістердің нәтижесінде әсері күшті дәрілерді заңсыз сату бойынша 16 қылмыстық іс қозғалыпты. Дәріхана қызметкерлеріне қатысты тағы 13 қылмыстық іс тіркелген. Бір мыңнан астам медициналық мекеме мен 300 кәсіпорын тексеріліп, 209 әкімшілік құқық бұзушылық анықталған. Сонымен қатар 500 мыңнан астам дәрі-дәрмектің және 1,5 мың тонна прекурсордың заңсыз айналымына шектеу қойылған екен. 73 кәсіпорынның басшысы жауапқа тартылған.

Алматыда рецептісіз дәрі сатқан төрт дәріхананың фармацевтеріне қатысты қылмыстық істер қозғалды. Ақтөбеде ірі фармацевтикалық ұйым тексеріліп, 400 мың дана дәрі тәркіленді. Түркістан облысында 100 тонна күкірт қышқылы тиісті күзетсіз тасымалданғаны белгілі болды. Ал Абай облысында 680 тонна прекурсорды жеткізу талаптары бұзылған.

ІІМ өкілдерінің айтуынша, заң талаптарын бұзғандарға қатаң жауапкершілік қарастырылған. Бұл бағыттағы бақылау мен тексеріс алдағы уақытта да жалғасады.