Ақтөбе облысында бопсалаумен айналысқан екі қылмыстық топ құрықталды — деп хабарлайды «Dalamedia» ақпараттық порталы.

Polisia.kz деректеріне сүйенсек, Хромтау қаласында күдіктілер шахтерлерді қорқытып, күш қолдану арқылы ақша талап еткен. Алайда жәбірленушілердің көбі құқық қорғау органдарына шағымданбаған.

Жедел іздестіру шаралары кезінде күдіктілер толық анықталып, барлық қатысушыны бір мезетте ұстау операциясы жүргізілген. Тінту барысында ақша және өзге де айғақ заттар тәркіленді.

Осыған ұқсас қылмыстық әрекет Ақтөбе қаласында да тіркелген. Мұнда бопсалаушылар тобы ойын-сауық орындарына қысым көрсетіп, күш қолданған.

Қазіргі таңда күдіктілердің барлығы ұсталып, уақытша ұстау изоляторына қамалды. Олардың басқа да қылмыстарға қатысы бар-жоғы тексерілуде.

Аталған деректер бойынша бопсалау фактілері негізінде қылмыстық істер қозғалды. Сонымен қатар заңсыз ұстау және бас бостандығынан айыру деректері бойынша қосымша тергеу жүргізілуде.

Полицияның мәліметінше, жедел әрекет нәтижесінде қылмыстық топтардың жолы кесіліп, ауыр салдардың алдын алуға мүмкіндік туған. Өкілетті органдар бұл бағыттағы жұмыс жалғасатынын айтты.