Ұлттық қауіпсіздік комитеті мамандары 160 тонна бағалы металды шетелге заңсыз шығармақ болғандардың жолын кескен, - деп хабарлайды «Dalamedia» ақпараттық порталы.

Жамбыл облысында шекарашылар 160 тонна алтын құрамды кен мен концентраттарды шетелге заңсыз шығармақ болғандарды ұстаған. Контрабанданың жалпы құны шамамен 1 млрд теңгені құрайды.

Сондай-ақ Ақтөбе облысында жүк көлігінің тіркемесіне жасырынған 18 шетелдік азамат анықталды. Ал Солтүстік Қазақстан өңірінде синтетикалық есірткі дайындауға арналған 5100 литр прекурсор тәркіленген.

Жалпы, жыл басынан бері 9 620 литр түрлі химиялық зат пен 1 тоннаға жуық тыйым салынған заттардың заңсыз тасымалына тосқауыл қойылған. ҰҚК-нің мәліметінше, бұл әрекеттердің нәтижесінде есірткі зертханаларының ізі анықталып, жойылған.

Қазір барлық деректер бойынша материалдар тиісті органдарға жолданып, процессуалдық шешім қабылданады.