Оқиғаға әлеуметтік желідегі келіспеушілік пен қорлау сипатындағы хабарламалар себеп болғаны айтылды. Алматы облысының қылмыстық істер жөніндегі мамандандырылған ауданаралық соты 34 жастағы Камиль Худайбердиевке қатысты істі қарап, оған үкім шығарды.

Тергеу деректеріне сәйкес, қайғылы жағдай биыл 11 ақпанда Есік қаласында болған. Сол күні таңертең күдікті баласын балалар орталығына апарып бара жатып, WhatsApp арқылы ағасынан қорлау мазмұнындағы хабарламалар алған. Кейін олар телефон арқылы сөйлескенімен, ортақ келісімге келе алмаған.

Осыдан кейін Камиль ағасының үйіне барған. Үй маңында туыстар арасындағы жанжал қайта өршіп, соңы ауыр қылмысқа ұласқан. Тергеу барысында оның ағасына бірнеше рет пышақ жарақатын салғаны анықталды. Жәбірленуші оқиға орнында көз жұмған.

Айыпталушы сотта өз әрекетін ағасының тарапынан қауіп болуы мүмкін деген күдікпен түсіндірген. Қылмыстан кейін ол оқиға орнында қалып, марқұмнан кешірім сұрағаны да айтылды.

Іс қысқа мерзімде қаралып, Камиль Худайбердиев өз кінәсін толық мойындаған. Жәбірленуші тараптың өкілі ретінде танылған үшінші ағасы Тимур Худайбердиев сотта айыпталушыны кешірген.

Сот барлық мән-жайды ескере отырып, айыпталушыға 8 жыл мерзімге бас бостандығынан айыру жазасын тағайындады. Үкім әзірге заңды күшіне енген жоқ.