Алматыда тоқтаусыз жауған нөсер салдарынан қала көшелерін су басып, бірқатар аумақта көлік қозғалысы қиындады, -деп хабарлайды «Dalamedia» ақпараттық порталы. Осыған байланысты коммуналдық қызметтер күшейтілген режимде жұмыс істеуге көшті.

Әлеуметтік желіде тұрғындар су басқан көшелер мен аулалардың видеоларын жариялап жатыр. Қала тұрғындарының айтуынша, кей аудандарда көшелермен жүру қиындап, кей үйлерде жарық та өшкен.

Желі қолданушылары жауынның күні бойы толастамай құйып тұрғанын айтып, мұндай нөсерге кәріз және су ағызу жүйелері шыдас бермей жатқанын жазуда. Әсіресе Төле би көшесі маңында су жиналып, тұрғындар қиындық көрген.

Синоптиктердің болжауынша, Алматыда жауын-шашын 12 мамыр күні түске дейін жалғасады. “Қазгидромет” мәліметіне сәйкес, алдағы уақытта найзағай ойнап, секундына 15–20 метрге дейін жел соғуы мүмкін. Кей аумақтарда қатты жаңбыр сақталады.

Қала әкімдігі ықтимал су басу жағдайларының алдын алу үшін коммуналдық қызметтердің тәулік бойы кезекшілігін ұйымдастырғанын мәлімдеді. Қазір көшелердегі суды сору және арық жүйелерін тазалау жұмыстарына арнайы техника, мотопомпалар мен жедел бригадалар жұмылдырылған.

Ресми мәліметке сәйкес, кезекшілікке мыңдаған жол жұмысшысы мен мыңнан астам арнайы техника тартылған. Сонымен қатар құтқару қызметі де қосымша техникамен күшейтілген режимде жұмыс істеп жатыр.