Алматыда толассыз жауған жаңбыр салдарынан халықаралық әуежай ғимаратының кей аумағын су басты, ,-деп хабарлайды «Dalamedia» ақпараттық порталы.

Instagram желісіндегі almatinec_live парақшасында жарияланған видеодан әуежай қызметкерлерінің нөсерден кейінгі салдарды жою жұмыстарын жүргізіп жатқанын көруге болады. Жазбада паспорт бақылауы аймағына су кіргені айтылған.

Видео сипаттамасында әуежай жұмысы уақытша тоқтап, кіріп-шығу жолдары жабылғаны, жолаушылардың ішке де, сыртқа да өте алмағаны көрсетілген.

Оқиғаға қатысты әуежайдың баспасөз қызметі пікір білдіріп, қатты жауын салдарынан Т1 және Т2 терминалдарының кей бөлігінде шатырдан су аққанын растады.

Әуежай өкілдерінің мәліметінше, ақау жарты сағат ішінде толық жойылған. Бұл жағдай рейстердің орындалуына әсер етпеген. Қазір әуежай штаттық режимде жұмыс істеп тұр.

Сондай-ақ мамандар ақаудың нақты себебін анықтап, алдағы уақытта мұндай жағдайдың қайталанбауы үшін инфрақұрылымға қосымша тексеру жүргізіп жатқаны хабарланды.