Мемлекет басшысы Қасым-Жомарт Тоқаев «Алатау қаласының арнаулы құқықтық режимі туралы» Конституциялық заңға қол қойды, — деп хабарлайды « Dalamedia» ақпараттық порталы.

Президенттің баспасөз қызметі таратқан мәліметке сәйкес, заңның негізгі мақсаты – Алатау қаласының қарқынды әрі тұрақты дамуына қажетті құқықтық және экономикалық негіз қалыптастыру. Жаңа құжат қалада инвестиция мен инновацияға қолайлы орта жасап, экономикалық өсімді жеделдетуге бағытталған дербес жүйе құруды көздейді.

Конституциялық заң аясында қаланы басқарудың жаңа моделі енгізіледі. Бұл ретте кәсіпкерлік, кеден саласы, цифрлық активтер, қаржы нарығы, әлеуметтік сала, қала құрылысы мен сәулет, экология, мәдениет пен спорт сияқты бірқатар маңызды бағыттарды реттеудің негізгі қағидалары айқындалған.

Сондай-ақ «Алатау резиденті» мәртебесі бекітілді. Бұл мәртебені әкімшілік белгіленген санаттар бойынша жеке және заңды тұлғаларға бере алады. Арнайы режим аясындағы құқықтар мен міндеттер осы мәртебеге қарай айқындалады.

Қаланың ұзақ мерзімді дамуы стратегиялық құжаттар арқылы қамтамасыз етіледі. Атап айтқанда, Алатаудың даму жоспары, мастер-жоспары және кешенді даму стратегиясы әзірленеді.

Бұдан бөлек, «ақылды қала» тұжырымдамасын іске асыру мақсатында қауіпсіздік жүйелері мен инфрақұрылым нысандарының деректері бірыңғай цифрлық басқару платформасына біріктірілмек.

Заңда сондай-ақ инвестициялық ахуал, инвесторларға берілетін кепілдіктер, салық-бюджет саясаты, жер қатынастары және қала дизайны бойынша негізгі нормалар қамтылған.

Конституциялық заңның толық мәтіні ресми басылымдарда жарияланатын болады.