Қазақстанда декреттік төлемдерді тағайындау жүйесіне өзгерістер енгізілмек. Енді бұл төлемді алу кезінде азаматтың табысын нақты әрі дәлелді түрде көрсету талап етіледі, ,-деп хабарлайды «Dalamedia» ақпараттық порталы.

Бұл өзгерістер Жоғары аудиторлық палатаның тексерісінен кейін ұсынылған. Негізгі мақсат – әлеуметтік төлемдер саласындағы ықтимал алаяқтықтың алдын алу және жүйенің ашықтығын күшейту.

Жаңа тәртіпке сәйкес, егер табыс қолма-қол алынған болса, оны растайтын кассалық чек немесе арнайы мобильді қосымшадағы деректер ұсынылуы тиіс. Сонымен бірге әлеуметтік салықтың төленгені мен міндетті медициналық сақтандыру қорына аударымдар туралы мәліметтер де есепке алынады. Табыс көлемі өзгерген жағдайда, ол салық декларациясындағы деректермен салыстырылып тексеріледі.

Мемлекеттік әлеуметтік сақтандыру қоры төрағасының орынбасары Марат Жәнібековтің айтуынша, қазіргі таңда декреттік төлемдерге қатысты заңсыз ұсыныстар да кездесіп отыр. Кейбір делдалдар декреттегі әйелдерге бір мезетте бірнеше төлем рәсімдеуді ұсынып, жұмыссыздық бойынша жәрдемақы алуға итермелейді.

Қор мұндай әрекеттердің заңға қайшы екенін ескертіп, әлеуметтік төлемдерді рәсімдеу кезінде тек ресми және заңды жолдарды пайдалануға шақырды.