Ақтөбе облысының Хромтау қаласында денесінде пышақ жарақаты бар ер адамның мәйіті табылды, — деп хабарлайды «Dalamedia» ақпараттық порталы.

 Қайғылы жағдай 3 мамыр күні Бейбітшілік даңғылы бойында болған. Оқиға туралы ақпарат полиция бөліміне келіп түскеннен кейін, жедел түрде оқиға орнына құқық қорғау органдары жеткен. Аумақта тексеру жүргізу барысында көптеген дене жарақаты бар ер адамның мәйіті анықталған.

Жедел-іздестіру шараларының нәтижесінде полиция қызметкерлері бұл қылмысқа күдікті ретінде 22 жастағы ер адамды ұстаған. Ол полиция бөліміне жеткізіліп, уақытша ұстау изоляторына қамауға алынды. Тергеу барысында күдіктіден жауап алынып, өз кінәсін мойындау деректері тіркелгені хабарланды.

Аталған дерек бойынша Қылмыстық кодекстің «Адам өлтіру» бабы бойынша іс қозғалып, сотқа дейінгі тергеу амалдары жүргізіліп жатыр. Өлімнің нақты себебін анықтау үшін сот-медициналық сараптама тағайындалған. Тергеу барысы құқық қорғау органдарының бақылауында.