Талдықорған қаласында үш жасар баланың денесіне ауыр дене жарақаттары салынғаны анықталды. Әлеуметтік желілерде тараған видеода дәрігердің бүлдіршінді тексеріп жатқан сәті көрсетілген. Кадрлардан баланың қатты жылап отырғаны және денесінде көгерген іздердің бар екені байқалады.

Оқиғаға қатысты Жетісу облыстық полиция департаменті түсініктеме берді. Ведомство мәліметінше, 2 ақпан күні сағат 21:00 шамасында медициналық мекемеден “102” арнасына үш жасар баланың зорлық-зомбылық белгілері бар дене жарақаттарымен жеткізілгені туралы хабарлама түскен.

Аталған дерек бойынша “Денсаулыққа қасақана ауыр зиян келтіру” бабы бойынша қылмыстық іс қозғалды. Күдікті ретінде баланың әкесі анықталып, алкогольдік масаң күйде болғаны белгілі болды. Ол ұсталып, уақытша ұстау изоляторына қамалды.

Қазіргі уақытта бала мен оның анасы ауруханада дәрігерлердің бақылауында. Тергеуге дейінгі тексеру жұмыстары жүргізіліп жатыр. Аталған іс Жетісу облыстық полиция департаменті басшылығының жеке бақылауына алынған.