Қырғызстанда сталкинг әрекеттері үшін қылмыстық жауапкершілік енгізу көзделіп отыр. Тиісті заң жобасы әзірленіп, қазір қоғамдық талқылауға ұсынылды, — деп хабарлайды «Dalamedia» ақпараттық порталы.

Құжатқа сәйкес, Қырғыз Республикасының Қылмыстық кодексіне 190-1 деген жаңа бап енгізу жоспарланған. Онда сталкинг ұғымы нақты айқындалып, адамның еркінен тыс қайта-қайта аңду, соңынан қалмау, түрлі жолмен байланыс орнатуға тырысу, соның ішінде интернет арқылы қысым көрсету әрекеттері осы санатқа жатқызылған.

Ұсынылған нормаға сай, мұндай құқықбұзушылықтар үшін алдымен айыппұл салу немесе бостандығын шектеу жазасы қарастырылмақ. Ал жағдай күрделене түссе, бір жылға дейін бас бостандығынан айыру жазасы қолданылуы мүмкін. Егер қудалау аса ауыр сипат алса, мысалы, кәмелетке толмағандарға, жүкті әйелдерге қатысты жасалса немесе қызметтік мүмкіндікті пайдалану арқылы іске асса, жаза мерзімі бес жылға дейін ұлғаяды.

Заң жобасын әзірлегендер қазіргі заңнамада мұндай жүйелі қудалауды жеке қарастыратын нақты норма жоқ екенін айтады. Дегенмен тәжірибеде мұндай әрекеттердің соңы көбіне ауыр қылмыстарға ұласып жатады.