Қазақстанда қоғамдық тамақтану орындары жаңа санитарлық талаптарға байланысты тығырыққа тірелуі ықтимал. Кәсіпкерлер тексерістер күшейсе, көптеген кафе мен мейрамхананың жұмысы тоқтауы мүмкін екенін айтып дабыл қағуда, -деп хабарлайды «Dalamedia» ақпараттық порталы.

Жаңа ережелер ас мәзірінен бастап, тазалық, су жүйелері мен техникалық талаптардың бәрін қамтиды. Соның салдарынан кәсіп иелері не қомақты қаржы жұмсап, нысандарын қайта жабдықтауға мәжбүр, не мүлде бизнесті жабуға тура келеді. Сала өкілдерінің бағалауынша, бұл өзгерістер жұмыс істеп тұрған орындардың 70–80 пайызына қауіп төндіруі мүмкін.

Мәжіліс депутаты Олжас Нұралдиновтың айтуынша, кәсіпкерлер Денсаулық сақтау министрлігі наурызда бекіткен нормаларға қарсы шағым түсіріп жатыр. Шілдеден бастап фудкорттарды орналастыру, санитарлық аймақтар, сондай-ақ желдету, жарықтандыру, су және кәріз жүйелеріне қойылатын талаптар күшеймек. Бұл өзгерістер мәзірге де әсер етеді.

Рестораторлардың сөзінше, көптеген нысан ескі стандартпен салынған, көбіне жалға алынған ғимараттарда орналасқан. Сондықтан жаңа талаптарды қолданыстағы орындарға енгізу оңай емес. Мәселен, бірінші қабаттағы мекемелер үшін желдету жүйесін шатырдан жоғары шығару талабы қосымша келісімдер мен шығынды қажет етеді.

Сала мамандары әсіресе шағын және орта бизнеске ауыр соққы болатынын айтады. Кафе, асхана, отбасылық шағын орындардың күрделі жөндеу жүргізуге немесе инженерлік жүйелерді толық жаңартуға мүмкіндігі шектеулі.

Ал санитарлық қызмет өкілдері жаңа талаптар соншалықты қатаң емес екенін алға тартады. Олардың пікірінше, өзгерістердің басым бөлігі бұрынғы нормалардан айтарлықтай ерекшеленбейді және орындауға болады.

Соған қарамастан, кәсіпкерлер бұл талаптарды іс жүзінде жүзеге асыру қиын әрі шығыны көп екенін айтып отыр. Олар биліктен бизнестің нақты жағдайын ескеріп, өзгерістерді біртіндеп енгізуді сұрайды.