Қаржылық мониторинг агенттігі блогер Эльмира Төлегенованың сотта айтқан сөздеріне қатысты ресми түсініктеме берді, — деп хабарлайды «Dalamedia» ақпараттық порталы.

14 сәуір күні өткен сот отырысында Эльмира Төлегенова тергеу кезінде өзіне және жұбайына қысым жасалғанын мәлімдеген болатын. Оның айтуынша, тергеушілер олармен дөрекі сөйлесіп, «жұбайы кінәні мойнына алмаса, барлық мүлкін тәркілеп, Instagram парақшасын жабамыз» деп қорқытқан.

Сонымен қатар блогер тергеу барысында олардың сайтының әзірлеушісінен 15 миллион теңге талап етілгенін де алға тартты.

Ал Қаржылық мониторинг агенттігінің дерегіне сүйенсек, күдіктілер Ерболат Жанәбілов пен Эльмира Төлегенова барлық тергеу әрекеттеріне адвокаттарының қатысуымен қатысқан. Ведомство өкілдері сотқа дейінгі тергеу кезінде немесе іс материалдарымен танысу барысында аталған тұлғалар тарапынан қысым көрсету, қорқыту немесе бопсалау фактілері бойынша ешқандай шағым түспегенін атап өтті.

Сондай-ақ агенттік мәліметінше, заң талаптарына сәйкес, тергеу барысында барлық процесс аудио және бейнежазбаға тіркелген.

Қазіргі уақытта Эльмира Төлегенованың сотта айтқан уәждері тексеріліп жатыр. Қорытындысына қарай тиісті құқықтық баға берілмек.