Қазақстанға келген америкалық саяхатшы-блогер Camperghini әлеуметтік желіде наразылық танытты, — деп хабарлайды «Dalamedia» ақпараттық порталы.

Оның айтуынша, сапарын ұзақ уақыт бойы жоспарлаған. Тіпті туризм мекемесімен келісімге келіп, ведомство оны күтіп алуға сөз берген. Ал іс жүзінде оны ешкім қарсы алмаған. Ол бұл туралы Instagram желісі арқылы жеткізді.

“Ресми шақырту алып, апталап, айлап дайындаласыз. Бірақ келген сәтте сізді ешкім қарсы алмайды. Көп уәде берілді, ал нәтиже көңіл көншітпеді”, – деп жазды ол.

Ал Туризм және спорт министрлігінің баспасөз қызметі бұл мәлімдемені жоққа шығарды. Ведомство өкілдері блогердің Қазақстанға ресми түрде шақырылмағанын айтты. Министрліктің мәліметінше, олар шетелдік блогерлермен және туристік ұйымдармен тек арнайы ақпараттық турлар аясында жұмыс істейді.

Ал «Kazakh Tourism» ұлттық компаниясы блогермен хат арқылы байланысқанымен, нақты келісімге келе алмағандарын мәлімдеді.

Айта кетейік, Camperghini әлемді аралау үшін өз үйі мен мүлкін сатып, Lamborghini Urus көлігін арнайы кемперге айналдырған. Қазір оның Instagram желісінде 800 мыңнан астам оқырманы бар.