Қасым-Жомарт Тоқаев пен Александр Вучич келіссөздер қорытындысы бойынша Бірлескен мәлімдеме қабылдады,-деп хабарлайды «Dalamedia» ақпараттық порталы.

Қос ел басшыларының қатысуымен ведомствоаралық құжаттар алмасу рәсімі өтті. Кездесу аясында екі ел арасындағы ынтымақтастықты нығайтуға бағытталған 10 меморандумға қол қойылды.

Атап айтқанда, тараптар денсаулық сақтау, құқықтық әріптестік, цифрлық даму мен жасанды интеллект, ақпараттық технологиялар және электрондық үкімет салаларында өзара іс-қимылды кеңейтуге келісті. Сонымен қатар ауыл шаруашылығы, ветеринария, ғылым және жоғары білім бағыттарындағы байланыстарды дамытуға уағдаластық жасалды.

Екі ел мәдени-гуманитарлық әріптестікке де басымдық беріп отыр. Осы орайда кино өндірісі мен материалдық емес мәдени мұраны қорғау салаларында бірлескен жұмыстарды жолға қою көзделген.

Бұдан бөлек, инвестициялық ынтымақтастықты күшейту және мемлекеттік басқару мен дипломатиялық кадрларды даярлау бағытында да өзара түсіністік туралы құжаттар қабылданды.

Қол қойылған келісімдер Қазақстан мен Сербия арасындағы серіктестікті жаңа деңгейге көтеруге мүмкіндік береді.