Астанада блогер Ерболат Жанабылов пен Эльмира Төлегеноваға қатысты сот тергеуі аяқталды, -деп хабарлайды «Dalamedia» ақпараттық порталы.

Мемлекеттік айыптаушы Олжас Хайруллаев соттан ерлі-зайыптыға 4 жыл бас бостандығынан айыру жазасын тағайындауды сұрады. Сонымен қатар, ол Ерболат Жанабыловты сот залында қамауға алуды ұсынды. Ал Эльмира Төлегеноваға қатысты үкімнің орындалуын бір жылға кейінге қалдыру мәселесін көтерді.

Прокурор айыпталушылардың мүлкін тәркілеу мәселесін де қозғады. Оның айтуынша, заңсыз жолмен алынған 247 млн 550 мың теңге мемлекет пайдасына өндіріліп, сол қаражатқа алынған 17 дана iPhone 16 мен 8 Hyundai Elantra көлігі тәркіленуі тиіс. Сондай-ақ Lamborghini Urus пен Lexus автокөліктеріне қойылған шектеуді өзгеріссіз қалдыру ұсынылды.

Бұдан бөлек, жәбірленушілерге өтемақы қоры үшін 20 АЕК көлемінде төлем өндіріп алу және сот шығындарын өтеу қажеттігі айтылды.

Ал айыпталушы блогер өзіне тағылған айыптарға жауап беруден бас тартты.