«КешYou» тобының 20 жылдық концертіне байланысты басталған пікірталас қайта ушығып, Баян Мақсатқызы мен Мөлдір Әуелбекова арасындағы жағдай қоғам назарын аудартты, — деп хабарлайды «Dalamedia» ақпараттық порталы.

Күні кеше Мөлдір Әуелбекова әлеуметтік желіде топтың мерейтойлық концертіне қатыспайтынын мәлімдеген болатын. Ол бұл шешімді өз парақшасында жариялап, өнер жолындағы бір кезеңнің аяқталғанын да атап өткен.

Әншінің айтуынша, «КешYou» концерті оның қатысуынсыз да жоғары деңгейде өтеді деп сенеді. Сонымен қатар ол өнердегі 22 жылдық жолына тоқталып, осы уақыт ішінде сахнада да, басқа салаларда да тәжірибе жинағанын жеткізген. Биыл жеке шығармашылық кеш өткізу жоспары бар екенін де айтқан.

Алайда бұл шешім продюсер Баян Мақсатқызының ашу-ызасын туғызған. Ол әлеуметтік желідегі Stories парақшасында Мөлдір Әуелбекованың суретін жариялап, өткір пікір білдірді.

Баян Мақсатқызының айтуынша, ол түсірілген деректі фильм барысында әншінің беделін қорғауға тырысқан, алайда концертке қатысудан ешкіммен ақылдаспай бас тарту оны қынжылтқан. Продюсер тіпті «КешYou» туралы фильмнің үшінші бөлімін түсіруге дайын екенін де жазған.

«Мен енді саған да, сен үшін жасаған дүниелеріме де түкіруге жол бермеймін. Енді оның неге “сатқын” деп айтылатынын түсіндіретін уақыт келген сияқты», – деп жазған ол.

Осылайша, «КешYou» төңірегіндегі бұрыннан айтылып келе жатқан әңгіме қайта қыза түсті. Қазіргі таңда тараптардан қосымша түсініктеме берілген жоқ.