Продюсер әрі актриса Баян Алагөзова әлеуметтік желіде өзінің гардеробына «Қыз Жібек» фильміндегі Жібек кейіпкерінің камзолы қосылғанын айтып, видео жариялады, ,-деп хабарлайды «Dalamedia» ақпараттық порталы.

Желіде кең тараған видеода ол бұл бұйымның өзіне ерекше қымбат екенін айтып, оны өмір бойы сақтайтынын жеткізген. Алагөзованың айтуынша, камзол «Қыз Жібек» фильмінде Жібек рөлін сомдаған Меруерт Өтекешеваның костюмі және ол белгілі суретші Гүлфайрус Исмайылованың қолөнер туындысы.

Алайда бұл жазба қоғамда түрлі пікір туғызды. Әлеуметтік желі қолданушылары тарихи мәні бар костюмнің жеке қолға өтуіне қатысты алаңдаушылық білдірді.

Осыған байланысты Мәдениет және ақпарат министрлігі ресми түсініктеме берді. Ведомствоның мәліметінше, «Қазақфильм» киностудиясының қорында Жібек кейіпкерінің түпнұсқа камзолы сақтаулы және ол ұлттық кино мұрасының маңызды бөлігі ретінде қорғалған.

Министрлік Алагөзова көрсеткен екінші камзолдың жеке меншікке қалай өткеніне қатысты жағдайдың қазір тексеріліп жатқанын мәлімдеді. Сондай-ақ мәдени құндылықтарды сақтау мәселесі тұрақты бақылауда екенін, тексеру нәтижесі қосымша хабарланатынын жеткізді.