Қазақстан паспорты Henley Passport Index жаһандық рейтингінде 57-орынға көтерілді. Енді ел азаматтары 78 мемлекетке визасыз қатынай алады,-деп хабарлайды «Dalamedia» ақпараттық порталы.

Соңғы жылдары қазақстандық паспорттың көрсеткіші біртіндеп жақсарып келеді. Мәселен, 2023 жылы еліміз 70-орында болса, 2024 жылы 66-сатыға, 2025 жылы 61-орынға көтерілген. Ал биыл 57-орынға тұрақтап, небәрі екі жарым жылда 13 сатыға жоғарылады.

Жаңартылған тізімде Қазақстан Боливия мен Беларусьтен озық тұр, алайда Косово мен Қытайдан кейін орналасқан. Орталық Азия елдері арасында еліміз орта деңгейде. Қырғызстан мен Өзбекстан 73-орында болса, олардың азаматтары 59 елге визасыз бара алады. Тәжікстан 79-орында, 53 бағытқа еркін қатынайды. Түрікменстан 87-орында тұр — 45 елге визасыз кіру мүмкіндігі бар. Ресей 44-орында орналасып, 113 елге жол ашқан. Беларусь 58-орында, ал Әзербайжан 66-орында — 67 бағытқа визасыз қатынайды.

Рейтингтің көшін Сингапур бастап тұр. Бұл елдің азаматтары 192 мемлекетке визасыз бара алады. Одан кейін Жапония, Оңтүстік Корея, Біріккен Араб Әмірліктері, сондай-ақ Еуропаның бірқатар елдері алдыңғы орындарда. Ал ең әлсіз паспорт Ауғанстанға тиесілі — оның азаматтары небәрі 24 елге визасыз бара алады. Тізімнің соңғы қатарында Сирия, Ирак, Йемен, Пәкістан, Сомали және өзге де елдер бар.

Henley Passport Index әр ел паспортының «күшін» азаматтардың қанша мемлекетке визасыз бара алатынына қарап бағалайды. Жаңартылған нұсқада 199 елдің паспорты мен 227 бағыт қамтылған. Егер елге визасыз кіруге мүмкіндік болса немесе виза шекарада рәсімделсе, балл беріледі. Ал алдын ала виза талап етілсе, ұпай есептелмейді.

Айта кетейік, бұған дейін 2026 жылдан бастап Қазақстанда паспорт пен жеке куәлік рәсімдеу құны өсетіні туралы хабарланған еді.