«ҚазТемірТранс» АҚ-тың бұрынғы вице-президенті Азамат Қапеновке қатысты сотқа дейінгі тергеу деректері жарияланды,-деп хабарлайды «Dalamedia» ақпараттық порталы. Ол қызметтік өкілетін асыра пайдаланды және қаржы жымқырды деген күдікке ілінген.

Тергеу мәліметінше, Қапенов жүк вагондарын пайдалану қызметін көрсету барысында өзімен байланысы бар компанияларға заңсыз артықшылық беріп отырған. Соның салдарынан «ҚазТемірТранс» АҚ-қа 5,2 млрд теңгеден астам шығын келген.

Қазір күдіктіге халықаралық іздеу жарияланған. Сот оны сырттай қамауға алу туралы шешім шығарған. Сонымен қатар, келтірілген залалды өтеу мақсатында Бас көлік прокуратурасы «Достық» станциясындағы терминалды тәркілеу жөнінде сотқа дейінгі өтініш берген. Астана сотының қаулысымен бұл мүлік мемлекет меншігіне өткізілді.

Айта кетейік, Азамат Қапенов 2024 жылдан бері іздеуде жүр. Құқық қорғау органдары оны әлі де іздестіріп жатыр. Тергеу жалғасуда.