«Атыраулық хакер» атымен танымал азамат Түркияда ұсталды, – деп хабарлайды «Dalamedia» ақпараттық порталы «Ақ Жайық» басылымына сілтеме жасап.

Полицияның дерегінше, күдікті бірнеше алаяқтық іс бойынша тергеліп, Қазақстан Республикасы Қылмыстық кодексінің 190-бабы («Алаяқтық») бойынша қылмыстық жауапкершілікке тартылған. Тергеу мәліметтеріне сүйенсек, ол Құрманғазы ауданының тұрғындарын инвестиция, IT-оқыту, аккаунттарды қалпына келтіру, қаржыны қолма-қол аудару және техника сату сияқты уәделермен алдап, 13 миллион теңгеден астам қаражатты иемденген.

Қаңтар айында Атырау қаласының мамандандырылған тергеу соты күдіктіге қатысты сырттай қамауға алу санкциясын беріп, кейін халықаралық іздеу жарияланған. Ол ақпан айында Түркияның Самсун қаласында ұсталған. Қазір Қазақстан Республикасының Бас прокуратурасы күдіктіні елге жеткізу үшін құжаттарды дайындап жатыр.

Еске сала кетейік, ол бұған дейін Атырау облысында бір отбасының жоғалу оқиғасынан кейін әлеуметтік желілерде танымал болған. Видеоларында өзін «атыраулық хакер» деп таныстырып, істі жеке тергеп жүргенін, геолокациялық және телефон деректерін көрсеткен. Бұл жазбалар Instagram желісінде тез таралып, қоғамда қызу талқыланған.

Бұған дейін күдікті Қазақстаннан тыс жерде жүргенін айтып, кейде Дубай қаласында тұратынын мәлімдеген.