Қазақстан Ішкі істер министрлігі заңсыз ойын бизнесін ұйымдастырды деген күдікпен халықаралық іздеуде жүрген блогердің Вьетнамда қолға түскенін мәлімдеді, -деп хабарлайды «Dalamedia» ақпараттық порталы.

Министрлік таратқан мәліметке сәйкес, күдікті Интерпол желісі арқылы Вьетнамның құқық қорғау органдарымен бірлескен әрекет нәтижесінде Камрань қаласында ұсталған. Ол ұзақ уақыт бойы әлеуметтік желілер арқылы онлайн-казиноны насихаттап, пайдаланушыларды құмар ойындарға тартумен айналысқан.

Тергеу деректеріне қарағанда, блогер жарнамалық бейнематериалдарды тұрақты түрде жариялап, арнайы сілтемелер мен промокодтар арқылы аудиториясын ойын платформаларына бағыттап отырған. Осы әрекеттері арқылы ол 100 миллион теңгеден астам заңсыз табыс тапқан. Қаржы оның атына тіркелген криптоәмияндарға аударылып келген.

Қазір күдіктіні Қазақстанға экстрадициялау мәселесі қарастырылып жатыр. Ведомство өкілдері шетелге жасырыну қылмыстық жауапкершіліктен құтқармайтынын атап өтті.

Айта кетейік, бұған дейін Қаржылық мониторинг агенттігі қазақстандық танымал блогер Қайсар Камзаға да іздеу жариялаған болатын. Ол әлеуметтік желілердегі парақшалары арқылы онлайн-казино платформаларын жарнамалап, ойын ұйымдастырушыларынан түрлі сыйақы алған деген күдікке ілінген.

Ресми мәліметке сүйенсек, күдікті бес жыл бойы Instagram және Telegram желілерінде белсенді болып, қолданушыларды арнайы сайттарға тіркелуге үгіттеген. Сонымен қатар, ол жарнамалық жазбаларында бонус ұсынатын жеке кодтарды да көрсетіп отырған.

Тергеу барысында заңсыз табысты жасыру үшін криптовалюта пайдаланылғаны анықталды. Сот шешімімен 182 736,741 USDT көлеміндегі криптоактивтерге тыйым салынды.