Алматы қаласының Дін істері жөніндегі басқармасы азаматтарды қорлайтын мазмұндағы материал таратты деген күдікпен өзін «ұстаз» ретінде таныстырып жүрген Нұржан Смағұловқа қатысты әкімшілік шара қолданды,-деп хабарлайды «Dalamedia» ақпараттық порталы деп жаз.

Оқиғаға қатысты мәліметке сүйенсек, әлеуметтік желіде өзін діни «ұстаз» ретінде көрсетіп жүрген Н.Смағұлов Instagram парақшасында азаматтардың ар-намысына тиетін пікірлер айтып, бейнематериалдар жариялаған. Оның жазбаларында адамдарды «сиырмен» салыстырған деректер анықталған.

Аталған жағдайдан кейін Алматы қаласының Дін істері жөніндегі басқармасы тексеріс жүргізіп, күдіктіге қатысты Қазақстан Республикасының Әкімшілік құқық бұзушылық туралы кодексінің 490-бабы 1-бөлігінің 3) тармақшасына сәйкес әкімшілік хаттама толтырды.

Сот шешімімен Н.Смағұлов әкімшілік құқық бұзушылық жасағаны үшін кінәлі деп танылды. Оған 25 айлық есептік көрсеткіш мөлшерінде, яғни 108 125 теңге көлемінде айыппұл салынды.