Түркістан қаласының әкімшілік құқық бұзушылықтар жөніндегі мамандандырылған ауданаралық соты “Түркістан халықаралық әуежайы” АҚ-ны монополияға қарсы заңнаманы бұзғаны үшін 14,3 миллион теңге көлемінде айыппұл салды, - деп хабарлайды «Dalamedia» ақпараттық порталы.

Іс Түркістан облысы бойынша Бәсекелестікті қорғау және дамыту агенттігі департаменті жүргізген тексеру нәтижесінде қозғалған. Ведомство авиаотынды бөлшек саудада сату нарығына талдау жасап, әуежай қызметіне қатысты тергеу бастаған.

Зерттеу барысында әуежайдың нарықта үстем жағдайын пайдаланып, авиаотын сатумен айналысатын кәсіпкерден әуежай аумағында жұмыс істеу құқығы үшін қосымша төлем талап еткені анықталған. Монополияға қарсы орган бұл әрекетті келісім мазмұнына қатысы жоқ артық міндет жүктеу деп бағалады. Мұндай талаптар Кәсіпкерлік кодексінің 174-бабына сәйкес заңмен тыйым салынған.

Сот әуежайды Әкімшілік құқық бұзушылық туралы кодекстің 159-бабы 3-1-бөлігі бойынша кінәлі деп танып, 14,3 миллион теңге көлемінде әкімшілік жаза тағайындады.