Алматы қаласында әлеуметтік желіде бейәдеп сөздер жазған екі шетел азаматы әкімшілік жауапкершілікке тартылды. Олар 15 тәулікке қамауға алынды.

Қалалық полиция департаментінің мәліметінше, құқық бұзушылық фактісі Медеу ауданында тіркелген. Әлеуметтік желіде жарияланған жазбаларда қоғамдық тәртіпке қайшы келетін, сондай-ақ Қазақстан заңнамасының талаптарын бұзатын сөздер анықталған.

Жиналған материалдар Алматы қаласының мамандандырылған ауданаралық әкімшілік сотына жолданып, сот шешімімен екі азаматқа да әкімшілік қамау жазасы тағайындалған.

Тексеру барысында, аталған жазбалардың Threads әлеуметтік желісінде жарияланғаны белгілі болды. Полиция интернет кеңістігі жауапкершіліктен тыс аймақ емес екенін атап өтті. Ведомство өкілдерінің айтуынша, әлеуметтік желілердегі пікірлер мен әрекеттер қоғамдық орындардағы мінез-құлықпен бірдей бағаланады.

Құқық қорғау органдары азаматтығына қарамастан, барлық тұлғаларды заң талаптарын сақтауға және өзара сыйластық қағидаларын ұстануға шақырды.