Қоғамдық белсенді Санжар Боқаев ұлттық компанияда қызмет еткен кезеңде ірі көлемде алаяқтық жасады деген күдікке ілінді, – деп хабарлайды «Dalamedia» ақпараттық порталы.

Бұл туралы Бас прокуратура төрағасының орынбасары Ерлан Өтегенов Сенат кулуарында мәлімдеді. Оның айтуынша, күдіктіге ұлттық компаниядағы қызметі кезінде қаражатты ірі көлемде жымқыру және заңсыз ағаш кесуді ұйымдастыру баптары бойынша айып тағылып отыр. Қазіргі таңда іс бойынша тергеу амалдары жүргізілуде.

Сонымен қатар, Бас прокуратура өкілінің сөзінше, Боқаевтың жақтастары талап етіп отырған істі ашық форматта қарауға еш кедергі жоқ.

Еске салайық, бұған дейін Алматыда Санжар Боқаев ұсталғаны хабарланған болатын. Оған көрінеу жалған ақпарат тарату, қоғамда теріс пікір қалыптастыру және алаяқтық жасады деген күдік тағылған.

Тергеу мәліметтерінде оның әлеуметтік желі арқылы жекелеген тұлғалардың әрекеттері туралы видеолар жариялап, кейін бұл әрекеттерді өзі ұйымдастырып, қаржыландырған болуы мүмкін деген дерек келтірілген. Айыптауға сәйкес, ол табысы төмен азаматтарды тартып, оларға ақша төлеп, ағаш кесу мен ұрлық сипатындағы әрекеттерге бағыттаған болуы ықтимал.

Бұған қоса, ол аса ірі көлемде қаржы жымқырды деген күдікке де ілінген.

Айта кетейік, өткен жылы Боқаев Алматыдағы Баума тоғайында ағаштардың жаппай кесілуі мүмкін екенін айтып, алаңдаушылық білдірген еді. Кейін бұл мәселе қоғамда үлкен резонанс тудырып, түрлі пікірталасқа себеп болды.