Енді жер беру ісі цифрлы форматқа көшуі мүмкін. Бұл туралы кеше өткен Мәжіліс жиынында сөз болды, — деп хабарлайды «Dalamedia» ақпараттық порталы.

Нақтырақ айтсақ, Мәжілістің Аграрлық мәселелер комитетінде топырақты қорғауға қатысты заң жобасы қаралды. Жиында ауыл шаруашылығына арналған жер телімін беру үрдісін электронды конкурс арқылы жүзеге асыру да талқыланды.

Мәжіліс депутаты Нұржан Әшімбетовтің сөзінше, бұл бастама Мемлекет басшысының 2025 жылғы 8 қыркүйектегі Жолдауында жүктелген міндеттерді орындауға сеп болмақ.

Ауыл шаруашылығы вице-министрі Азат Сұлтанов Үкімет ұсынған өзгерістерге тоқталды. Оның айтуынша, жаңа тәсіл жерді бөлу барысын толықтай цифрлық жүйеге көшіруге мүмкіндік береді. Осылайша рәсімдер ашық болады. Осыған орай Жер кодексіне бірқатар өзгеріс енгізілуі мүмкін.

Жаңа жүйеге сәйкес балдық көрсеткіштер де енгізіледі. Ал конкурстар мемлекеттік мүлік тізілімінің веб-порталында өтеді. Өтінім қабылдау, жеңімпазды анықтау үрдістерінің барлығы автоматтандырылады. Осылайша конкурс мерзімі 90 күннен 45 күнге дейін қысқармақ. Сонымен қатар қатысушылар бизнес-жоспар дайындамай-ақ, проактивті форматта өтінім бере алады. Нәтижесін жүйе өзі анықтайды. Тіпті қосымша жеңімпаз да мәлім болып, келісімге келуден бас тартқандарға шектеу енгізіледі.

Талқылау барысында депутаттар заң жобасындағы ұғымдарды нақтылау, жер санаттарын бағалау және кадастрлық құнын өзгерту сынды бірқатар мәселені тілге тиек етті. Сондай-ақ жергілікті атқарушы органдардың жаңа жүйеге дайындығы, оның ішінде инфрақұрылым мен мамандардың жеткіліктілігі, цифрлық платформаның әзірлігі де сөз болды.

Жиынға Мәжіліс депутаттарымен қатар орталық мемлекеттік органдардың, «Атамекен» ұлттық кәсіпкерлер палатасының, салалық ұйымдардың және жергілікті атқарушы органдардың өкілдері қатысты. Отырыста айтылған ұсыныстар алдағы уақытта заң жобасын жетілдіру барысында ескерілмек.