Мәскеуде жеті жасар қыз ішінде қомақты қаржысы бар сөмкені терезеден шашып жіберген, -деп хабарлайды «Dalamedia» ақпараттық порталы.

ТАСС агенттігінің мәліметінше, оқиға Мещан ауданында болған. Қыз анаcымен сөзге келіп қалып, ренішін осылай шығарған. Сөмкенің ішінде жүз долларлық купюралармен 88 мың доллар болған.

Ұшып кеткен ақшаның бір бөлігін көшедегі жасөспірімдер жинап алған. Кей деректерге сүйенсек, олар ақшаның бір бөлігін өздеріне қалдырып, қалғанын өртеп жіберген. Тіпті кейбір купюраларды құстар алып кеткені де айтылады.

Mash Telegram-арнасының хабарлауынша, жасөспірімдер 83 мың долларды тауып, кейін бұл туралы ата-аналарына айтқан. Ата-аналары өз кезегінде ақшаны иесіне қайтару жөнінде шешім қабылдаған.

Ал РЕН ТВ мәліметінше, шамамен 5 мың доллар жан-жаққа шашылып кеткен, ал 83 мың доллар кері қайтарылған.

ТАСС дерегіне сүйенсек, табылған қаражат әзірге құқық қорғау органдарының бақылауында. Ақша оқиғаның барлық мән-жайы анықталғаннан кейін ғана заңды иесіне беріледі.