Түркістан облысы Арыс ауданында агроөнеркәсіп саласында аса ірі мөлшерде бюджет қаражатын жымқыру бойынша сот үкімі шықты, — деп хабарлайды «Dalamedia» ақпараттық порталы.

Бас прокуратураның мәліметінше, «Ы» ауыл шаруашылығы өндірістік кооперативінің жетекшісі 2021 жылғы сәуірде ақпараттық жүйеге жалған дерек енгізіп, 2470 бас аналық ірі қара мал мен 120 бас асыл тұқымды бұқа жалға алынды деп көрсеткен. Осыған сәйкес, кооперативтің есепшотына мемлекеттен 24 700 000 теңге субсидия аударылған.

Алайда іс жүзінде тек 18 бас асыл бұқа мен 450 бас аналық ірі қара малға селекциялық жұмыстар жүргізілгені анықталды. Заңсыз алынған қаражат сомасы 20 200 000 теңгені құрады.

Прокуратура Қылмыстық кодекстің 190-бабы 4-бөлігі 2-тармағы («аса ірі мөлшердегі алаяқтық») бойынша сотқа дейінгі тергеуді аяқтады.

Сот әйелді кінәлі деп танып, оған 4 жылға бас бостандығынан айыру және 5 жылға коммерциялық ұйымдарда басшылық қызмет атқару құқығынан айыру жазасын тағайындады. Заңсыз алынған қаражат толық көлемде мемлекет кірісіне қайтарылды. Алайда үкім әлі заңды күшіне енген жоқ.