Тараз қаласында қайғылы жағдай орын алды 36 жастағы әйел 2021 және 2023 жылы туған екі баласын бесінші қабаттың терезесінен лақтырып жіберген. Оқиға Төле би даңғылы бойындағы жатақханалардың бірінде тіркелді.

Екі бала да тірі қалды және жедел түрде Жамбыл облыстық көпсалалы балалар ауруханасына жеткізілді. Қазіргі уақытта олар жансақтау бөлімінде ем қабылдауда.

Күдікті ұсталып, уақытша ұстау изоляторына қамалды. Қазіргі кезде сотқа дейінгі тергеп-тексеру жүргізіліп жатыр, барлық қажетті тергеу әрекеттері кешенді түрде жүзеге асырылуда. Қазақстан Республикасының заңнамасына сәйкес процессуалдық шешім қабылданады. ҚР ҚПК-нің 201-бабына сәйкес қосымша ақпарат жарияланбайды, – деп хабарлады Тараз қаласының полиция департаментінің баспасөз қызметі.

Еске сала кетейік, былтыр Павлодар қаласында бір әйел өзінің екі баласын терезеден лақтырып, соңынан өзі де секірген қайғылы оқиға тіркелген болатын. Сол дерек бойынша да сотқа дейінгі тергеу жүргізілген.